ލިޔުނީ: ޢަބްދުއްރަޝީދު ޢަލީ
އެއް ދުވަސް ފަހުން މިއޮތީ އަނެއްކާވެސް ރާއްޖޭގެ ވެރިކަމަށް މީހަކު ހޮވުމަށްޓަކައި ވޯޓްލާން ޖެހިފައެވެ. ނަމަވެސް ވޯޓްލާން ދިޔުމުގެ ކުރީން ރައްޔިތުންގެ ޙަޤީޤީ މައްސަލަތަކާ މެދު ވިސްނައި، ފިކުރު ހިންގައި ބަލާލީ ކިތައް މީހުންބާއެވެ. ރައްޔިތުންގެ މައްސަލަތައް ޙައްލުކޮށްދޭނެ އެއްވެސް މީހަކު އަޅުގަނޑު މެންގެ ކުރިމަތީ އެބަހުރި ބާއެވެ. ކޮންމެ ކެންޑިޑޭޓަކު ވެސް ނުފުއްދޭހައި ގިނަ ވަޢުދުތަކެއް ވަމުން، ރައްޔިތުންނަށް އަވާމެންދުރު ދައްކަމުން އެބަދެއެވެ. ގިނަ ބަޔަކު އެކަމާ އުފާކުރަމުންވެސް އެބަ ގެންދެއެވެ. ނަމަވެސް މިޤައުމުގައި ހުރި މައްސަލަތައް ދުވަހަކުވެސް ޙައްލުވާ ތަނެއް، އަދި ހަމަޖެހިލައިގެން ރައްޔިތުންނަށް މިޤައުމުގައި ދިރި އުޅެވޭނެ ގޮތެއް ފެންނާކަށް ނެތެވެ.
މުޅި ޤައުމު ލޫޓުވަނީއެވެ. އެމީހަކަށް އަތުޖެހުނު އެއްޗެއް، އަތުޖެހުނު މިންވަރަކުން، އަތުޖެހުނު ގޮތަކަށް ލޫޓުވަނީއެވެ. ދައުލަތުގެ މަޤާމްތަކުގައި ތިބި މީހުން ދައުލަތް ލޫޓުވަނީއެވެ. ދެން ތިބި ބަޔަކު ނިކުމެ ކޮންމެ ދުވަހަކު ރައްޔިތުންގެ ފިހާރަތައް ފަޅައި ލޫޓުވަނީއެވެ. ވިޔަފާރި ވެރީން، ހިތުހުރި އަގެއްގައި މުދަލުގެ އަގު ޖަހައިގެން ރައްޔިތުން ލޫޓުވަނީއެވެ. މަސައްކަތުގައި އުޅެއުޅެ ވަރުބަލިގެން ގެއަށް އައިސް ފިނިކޮށްލަން އޭސީ ޖައްސާލާއިރު، އޭސީ މަސައްކަތް ނުކޮށްގެން ބަލާލާއިރު އައުޓްޑޯ ޔުނިޓް އިންނަނީ ވަގަށް ގެންގޮސްފައެވެ. ޕްރައިވެޓް އޮފީހެއް ފަޅާލައިގެން ވަދެ އެ އޮފީހުގައި ހުރި ތިޖޫރީ ހިފައިގެން ނިކުމެ، ޖެހިގެން ހުރި ގެއަށް ވައްދައި، ތިޖޫރީ ފަޅާލުމަށްފަހު، އެތިޖޫރީ އެގޭ ކުރިމަތީ މަގުމައްޗަށް އެއްލާލާ މަންޒަރު ހުރީ ސީ.ސީ.ޓީ.ވީ ކެމެރާތަކުގައި ރިކޯޑް ކުރެވިފައެވެ. ނަމަވެސް ތަޙުޤީޤު ޓީމަށް އެމީހުން ވަކިކުރާކަށް ނޭގެއެވެ.
ޒުވާނެއް، މެދުޢުމުރެއް، ނެތި އާބާދީގެ ބޮޑު ބަޔެއް ތިބެނީ މަގުމަތީގައި ބިއްޖެހިފައެވެ. ރަގަޅަށް ކޮޅަށް ހުރެވޭ މީހަކު މަދެވެ. ލޯހުޅުވޭ ފަދަ ހާލަތެއްގައި ހުންނަ މީހަކަށް މަގުމައްޗަށް ނިކުންނަން ދަތިވެއްޖެއެވެ. ގެއިން ނިކުމެގެން ސައިކަލާ ހަމައަށް ދެވެންވާއިރަށް ތިން ހަތަރު މީހުން، ސައިތައްޓެއް ބޯލަން 10 ރުފިޔާ ދޭށޭ ކިޔައި ސަލާން ޖަހަން ނާންނަ ފަހަރެއް މަދެވެ. އުކާލަން ނެރޭ ކުޅި ކޮތަޅު ގޭގެ ތިރީގައި ބަހައްޓާލެވޭކައް ނެތެވެ. ބުޅަލަށްވުރެ ކުރީން މީހުން އައިސް ކުނި ކޮތަޅު ހާވަން ފަށައެވެ.
އަދުލު އިންސާފު ލިބޭނެ ކަމަށް އުންމީދު ކުރުމަކީވެސް މިހާރު މިޤައުމުގައި މޮޔަކަމެކެވެ. އިންސާފު ހޯދަން ބޭނުންވާ މީހަކު ހުރިނަމަ އަމިއްލަ އަށް މަގުމަތީން އިންސާފު ހޯދަންވީއެވެ. ޤާނޫނުގެ ތެރެއިން އެކަން ނުވާނެކަން އެންމެންވެސް ޤަބޫލު ކުރެއެވެ. ގޭގެ އެޕާޓްމަންޓެއް ކުއްޔަށް ހިފައިގެން އުޅުނު މީހަކު، ކުލި ނުދައްކައި އެތައް ދުވަހެއް ވުމަށްފަހު ފިލައިގެން ހިގައްޖެއެވެ. ކުލީގެ ގޮތުގައި ލައްކަ އަކަށްވުރެ ގިނަ ރުފިޔާ އާއި، ކަރަންޓް ބިލާއި ފެން ބިލަށް އަރާފައިވާ އެތައް ހާސް ރުފިޔާއެއް އޮތީ ނުދައްކައެވެ. ނިކުމެގެން ދިޔައިރު ބިލްތައް ނުދައްކާތީ، އެޕާޓްމަންޓްގެ ކަރަންޓާއި ފެންހުރީ ކަނޑާލާފައެވެ. ތަނަށް ވަދެވޭ ވަރުވީ، ލައްކައަކަށް ވުރެ ގިނަ ރުފިޔާ ޚަރަދު ކޮށްގެންނެވެ. ފާޚާނާ ސެޓްތަކާއި، ޓައިލްސްތަކަށް ދަންދެން ޖެހުނީ ބަދަލު ކުރާށެވެ.
ކުލި ހޯދަން ކޯޓްގައި އުޅޭތާ 3 އަހަރު ވީއެވެ. ސާބިތު ދަރަނީގެ ޙުކުމް ތަންފީޒު ކޮށްދިނުމަށް އެދި ކޯޓަށް ހިނގާތާ 2 އަހަރު ވެއްޖެއެވެ. ދައުވާ ލިބޭ މީހާ ކޯޓަށް ހާޟިރުކުރެވޭނެ ގޮތެއް ނުވިއެވެ. އަލަށް ތަންފީޒު ކުރަން ފެށި މަދަނީ އިޖުރާތުގެ ޤާނޫނުގެ ދަށުން، ދައުވާ ލިބޭ މީހާ ކޯޓަށް ހާޟިރު ނުވުމުން، ދައުލަތަށް އޭނާ ކޯޓަށް ހާޟިރު ކޮށްދެވޭނެ ގޮތެއް ނެތެވެ. އޭނާގެ މުދަލެއް ހުރިތޯ ބަލަން ދައުލަތުގެ ކަމާގުޅޭ މުވައްސަސާތަކަށް ކޯޓުން ލިޔެގެން އުޅޭތާ އަހަރެއް ވަނީއެވެ. ކޯޓުން ފޮނުވި ސިޓީއަށް އަހަރަކާ ގާތްވެފައި ވީނަމަވެސް އެމުވައްސަސާތަކުން ޖަވާބެއް ނުދެއެވެ. އެހެންކަމުން މި އަހަރު އަދި ކޯޓުން މިމައްސަލަ ތާވަލެއް ނުކުރެއެވެ. ދެން ހަމަ އެކަނި އޮތް ހައްލަކީ، މަގުމަތީ ކޯޓްގައި މައްސަލަ ތާވަލު ކުރުމެވެ.
މިޤައުމުގެ ހާލަކީ މިއެވެ. މިކަންތައްތައް ރަގަޅު ނުކުރެވޭ ނަމަ ކީއްކުރަން އަޅާ އެއާޕޯޓެއް، ބުރިޖެއް ހެއްޔެވެ. މިއަދު ކޮންމެ މީހަކު ވެސް ވިސްނަމުން ދަނީ މިނޫން ތަނަކަށް ދިރިއުޅުން ބަދަލު ކުރެވޭނެ ގޮތަކަށެވެ. މިކަންތައްތައް ބޮޑު ނުވާ ވެރިއެއްގެ ބޭނުން ރައްޔިތުންނަށް އެބަ އޮތް ހެއްޔެވެ. މިމައްސަލަތައް ޙައްލުކޮށްދެވޭ ވަރުގެ މީހަކު ނެތް ނަމަ ވަގުތުތައް ބޭކާރުކޮށްގެން ވޯޓްލާން ޖެހޭ ސަބަބެއް އެބަ އޮތްހެއްޔެވެ.
No comments:
Post a Comment