ދި އަންބެއަރަބްލް ލައިޓްނަސް އޮފް ބީންގް – މިލާން ކުންޑެރާ

ލިޔުނީ: ނައީމް އިބްރާހިމް (ނައިމްބެ)

އަދަބިއްޔާތުގެ ދުނިޔެ މިހަފްތާގައި ސިއްސުވާލީ މަޝްހޫރު ލިޔުންތެރިޔާ މިލާން ކުންޑެރާގެ މަރުގެ ޚަބަރާއި އެކީގައެވެ. ކުންޑެރާގެ ފޮތްތައް، އަދި ވަކިން ޚާއްސަކޮށް "ދި އަންބެއަރަބްލް ލައިޓްނަސް އޮފް ބީންގް" އަކީ މިދިޔަ ފަންސާހަކަށް އަހަރުގެ ތެރޭގައި ޝާއިއު ކުރެވުނު އެންމެ ނުފޫޒުގަދަ ފޮތް ތަކުގެ ތެރޭގައި ހިމެނޭ ފޮތެކެވެ. އެފޮތަކީ  ލޯތްބާއި، އައިޑެންޓިޓީއާއި، އެގްޒިސްޓެންޝަލިޒަމް (ވުޖޫދިއްޔަތުގެ) ގެ ފުން ކަނޑުގެ އެންމެ ފުނަށް ފީނަންޖެހޭ ފަދަ ޝައުގުވެރި ވާހަކައެކެވެ. ކުރީގެ ޗެކޯސްލޮވާކިއާގެ ސިޔާސީ ހަލަބޮލިކަމުގެ ތެރޭގައި ކިޔާދީފައިވާ މި ވާހަކަ ދައްކުވައިދެނީ ގުޅިފައިވާ ހަތަރު މީހެއްގެ ދިރިއުޅުމާއި އެމީހުންގެ ގުޅުންތަކާއި އެމީހުންގެ ހަޔާތުގެ އިޚްތިޔާރުތައް ބައްޓަންކޮށްފައިވާ ގޮތެވެ. އެމީހުންގެ "ވުޖޫދުގެ ބަރުދަނުން" ނެވެ.

ކުންޑެރާގެ މި ވާހަކައަކީ އެންމެ މަތީފެންވަރުގެ އަދަބިއްޔާތުގެ ލިޔުމެއް ކަމަށް ގިނަ ބަޔަކު ބަލައިގަތީ، އޭނާގެ އަމިއްލަ ނަފްސުގެ އިންޓްރޮސްޕެކްޓިވް ނެރެޓިވް ސްޓައިލް އާއި ތޫނުފިލި ފަލްސަފާވެރި ވާހަކަތަކެއް މިފޮތުގައި އެކުލެވިގެންވާތީއެވެ.  ވާހަކައިގައި އުޅޭ ކޮންމެ މީހަކުވެސް ދައްކުވައިދެނީ އެމީހެއްގެ އަމިއްލަ އެދުންތަކާއި،ފިކުރުބޮޑުވުންތަކާއި، ނުތަނަވަސްކަމާއި، ބިރުވެރިކަމާއި، ހަޔާތުގެ ފުށުއެރުންތަކާއި، ތައާރުޒުތަކާއި ކުރިމަތިލާން ޖެހޭގޮތެވެ. މި ފޮތުގައި ހުނަރުވެރިކަމާއެކު ދައްކައިދީފައިވަނީ މިނިވަންކަމާއި، ތަޤްދީރާއި، ދިރިއުޅުމުގެ މާނަ ހޯދުމުގެ މައުޟޫޢުތައް، ދާއިމީކަމުން އެއްކިބާވެފައިވާ މިދުނިޔޭގެ ހަޔާތުގައި ހިމެނޭ ގޮތެވެ. ކުންޑެރާގެ ފުން ވިސްނުންތަކާއި، އިބާރާތް ތަކުގެ ރީތި ކަމާއި މާނަ ފުންކަމުން "ދި އަންބެއަރަބްލް ލައިޓްނަސް އޮފް ބީންގް" އަކީ ކިޔުންތެރިޔާއަށް އެންމެ ފަހު ސަފްހާއާ ޖެހެންދެންވެސް ގިނަ ދުވަސްތަކެއް ވަންދެން ސިކުނޑީގައި ދިގުދެމިގެންދާފަދަ  އަސަރުގަދަ ފޮތެކެވެ.

 "ދި އަންބެއަރަބްލް ލައިޓްނަސް އޮފް ބީންގް" ފެށެނީ "ލުއިކަމުގެ" ފަލްސަފާ ގަބޫލުކުރާ ޑޮކްޓަރު ޓޮމާސް ގެ ވާހަކައިންނެވެ. އޭނާއަކީ "އަންހެނުން ހިތި" މީހެކެވެ. އޭނާ އަށް ލުއިކަމަކީ ކޮމިޓްމަންޓާއި ޒިންމާއެއް ނެތުމެވެ. މިއީ އޭނާގެ މަސައްކަތުގެ މާހައުލުގައާއި އޭނާގެ ލޯބީގެ ގުޅުންތަކުގައި ވެސް އޭނާ އަމަލުކުރާ ފަލްސަފާއެވެ. އޭނާ ދެކެނީ ލޯތްބަކީ ދިރިއުޅުމުގެ ބަރުދަނުން ސަލާމަތްވެ،މައުނަވީ ޖަޒުބާތީ ގުޅުންތަކުން ދުރުވެ، ހަމައެކަނި ވަގުތީ ޖިންސީ ގުޅުންތަކުން އުފާ ހޯދުމުގެ ގޮތުގައެވެ. ނަމަވެސް އޭނާގެ މިފަލްސަފާއަށް ގޮންޖެހުންތަކެއް ކުރިމަތިވަނީ އޭނާއަށް ލޯބިވެވޭ ޒުވާން ވެއިޓަރެއް ކަމަށްވާ ޓެރެޒާއާ ބައްދަލުވާ ހިސާބުންނެވެ. ފުރަތަމަ އޭނާ ދެކޮޅު ހެދި ނަމަވެސް ފަހުން ޓޮމާސް އަށް ޓެރެޒާ ދެކެ ލޯބިވެވި، އެންމެ ފަހުން އޭނާގެ "ލުއިކަމުގެ" ވުޖޫދަށް ބުރޫއަރައެވެ.

ޓެރެޒާއަކީ ޓޮމާސްގެ "ލުއިކަމުގެ" ފަލްސަފާއާއި ޚިލާފަށް "ބަރުދަން" ރަމްޒު ކޮށްދޭ ޝަހްސިއްޔަތެކެވެ. އޭނާގެ އިންސެކިއުރިޓީތަކާ އޭނާ ކުރިމަތިލާއިރު، ޓޮމާސް އާއި އެކު އޮންނަ ގުޅުމުގެ ތެރެއިން ހަމަޖެހުމާއި ގާތްކަން ހޯދައެވެ. ނަމަވެސް އެދެމީހުންގެ ލޯބި ފުންވަމުން ދާވަރަކަށް ޓެރެޒާއަށް ހަސަދަވެރިކަމާއި، ޓޮމާސް އޭނާ ދޫކޮށްލަފާނެ ކަމުގެ ބިރުގެ "ބަރުދަން" އޭނާގެ ހިތުގައި އުފެދެއެވެ. ދެމީހުންގެ ގުޅުން އެންމެ ފަހުން ވެގެންދަނީ "ލުއިކަމާއި" "ބަރުދަނާއި" ދެމެދު ހިގާ ދާއިމީ ހަނގުރާމައަކަށެވެ.

ޓޮމާސްގެ ދެވަނަ ލޯބިވެރިޔާ ސަބީނާ ރަމްޒު ކުރަނީ "ލުއިކަމުގެ" ނަޒަރެކެވެ. އޭނާ އެކަން ބަލައިގަންނަނީ، އެއީ އޭނާއަށް މިނިވަންކަމާއި މުޖުތަމައުގެ ރޮގުތަކުން މިންޖުވެވޭ ކަމެއް ގޮތުގައެވެ. ސަބީނާ އަކީ ޖިންސީ މިނިވަންކަންކަމުގެ ތެރޭން ދާއިމީ ބަނދެވުންތަކެއް ނެތި އުފާ ހޯދާ ޒުނާނެކެވެ. ނަމަވެސް އޭނާއަށް ފަހުން އިހުސާސްވަނީ މި "ލުއިކަމުގެ" ހަގީގީ އަގަކީ ރޫހާނީ ހުސްކަމާއި ހަގީގީ ގާތްކަމުން ދުރުވުމުގެ ފުން އިހުސާސެއްގޮތުގައެވެ.

ހަތަރުވަނަ މީހެއްގެ ގޮތުގައި ހިމެނޭ ޔުނިވާސިޓީގެ ޕްރޮފެސަރު އަދި ފަހުން ޓެރެޒާގެ ލޯބިވެރިޔާ ފްރާންޒް އަކީ ވެސް "ބަރުދަނުގެ" ރަމްޒެއްގެ ގޮތުގައި ހިމެނޭ މީހެކެވެ. އޭނާގެ ކިބައިގައި ކޮމިޓްމަންޓާއި ވަފާތެރިކަން އެކުލެވިގެންވާއިރު، އޭނާ ބޭނުންވަނީ ޓެރެޒާއާ އެކު ސްޓޭބަލް ގުޅުމެކެވެ. ނަމަވެސް ފަހުން އޭނާއަށް ވިސްނޭ ގޮތުގައި އޭނާ އެދެމީހުންގެ ގުޅުން ކޮންޓްރޯލުކުރަން ބޭނުންވުމާއި ހުރެ އެދެމީހުންގެ ގުޅުން ވަނީ ލޯބިގެ ގުޅުމަކަށް ނޫނެވެ. ވޭންދެނިވި، ފައްކާ ނުވާ ވަގުތީ ކަމަކަށެވެ.

މިލާން ކުންޑެރާ އަކީ އަދަބިއްޔާތުގެ ދުނިޔޭގައި އެހާ މުހިންމު ލިޔުންތެރިއަކަށްވީ އޭނާގެ މަސައްކަތްތަކުގެ މައިގަނޑު ސިފައަކީ ފަލްސަފާގެ ފުންކަމާއި، ވާހަކަ ކިޔައިދިނުމާއި، އިންސާނީ ގުޅުންތަކުގެ އެންމެ ފުންމިން ހިނެނިފައިވުމެވެ. ކުންޑެރާގެ ލިޔުމުގައި ގިނަ ފަހަރަށް ފިކްޝަން، ފަލްސަފާ، އަދި ސިޔާސީ ކޮމެންޓްރީގެ އުނިއިތުރުތައް އެއްކޮށްލައިގެން އިންސާނާގެ ވުޖޫދިއަޔަތުގެ އެންމެ އަޑިއަށް ފުންކޮށް ވިސްނާ ފިކުރު ކުރަން މަޖުބޫރު ކުރުވައެވެ. އަދަބިއްޔާތަށް ކުންޑެރާގެ ޚިދުމަތްތަކުގެ ސަބަބުން ބައިނަލްއަޤްވާމީ ގޮތުން އޭނާއަށް  ލިޔުންތެރިންގެ ތަޢުރީފު އޮހި، ޒަމާނީ އަދަބިއްޔާތުގައި އެންމެ ނުފޫޒުގަދަ އަދި އެންމެ މުހިންމު އެއް އަޑުގެ ގޮތުގައި އޭނާގެ މަޤާމު ނުހަނު ވަރުގަދަވިއެވެ. އޭނާގެ ލިޔުންތައް ކިޔުންތެރިން އިންސްޕަޔަރކޮށް، ފިކުރީ ދަތުރުތަކަކަށް ތައްޔާރުކޮށް، އަދަބީ މާހައުލަށް އަދި ޚާއްސަ ކޮށް "ވުޖޫދިއްޔަ" ލިޔުންތަކަށް ދިގުދެމިގެންދާ އަސަރެއް ކުރުވިއެވެ.